Не се знае дали штетниот ориз завршил на нашиот пазар
Македонија нема ниту закон ниту лабораторија каде што би се проверувала генетски модифицираната храна
Никој во Македонија не знае дали во земјава е увезен генетски
модифициран ориз произведен во Кина, кој неодамна бил забранет за
користење во исхраната и повлечен од пазарите во Британија, Франција и
во Германија. За оризовиот скандал што ја тресе Европа, надлежните
институции во земјава речиси и не слушнале. Официјално, во Македонија
нема закон што го забранува увозот на генетски модифицираната храна,
ниту постои референтна лабораторија за проверка на исправноста на
ваквата храна.
Според медиумите во Западна Европа, оризот што
бил повлечен не смее да се користи како храна за луѓето. Надлежните
државни институции велат дека нема причина за паника, зашто до јули
годинава во земјава не бил увезен ориз од Кина, но не ја исклучуваат
можноста дел од забранетиот ориз, по шверцерски канали сепак да завршил
на домашниот пазар.
Меѓународната организација за заштита на
животната средина „Гринпис“ деновиве предупреди дека европските
потрошувачи се во опасност ако во исхраната го користат неодобрениот
генетски модифициран ориз од Кина. Од Гринпис велат дека по
лабораториските анализи утврдиле дека оризот по потекло од Кина содржи
протеин што може да предизвика алергиска реакција кај луѓето.
Познавачите велат дека нашиот пазар е преплавен со генетски
модифицирана храна, но нема лабораторија што може да ја испита
штетноста на ГМО-храната за здравјето на човекот. Од друга страна, ниту
произведувачите ниту увозниците не го почитуваат законот што бара на
самата декларација на производот да биде посочено дали содржи ГМО.
Надлежните
велат дека во посебни случаи се испраќаат мостри на проверка во
странство, но дека тоа чини пари и се' поретко се практикува.
-
Ние немаме закон за генетски модифицирани организми како другите
европски земји и соседството. Во Законот за безбедност на храна децидно
пишува дека е забрането во земјава да се внесува храна од растително
потекло што содржи генетски модифицирани организми, но тоа во
практиката не се контролира. Ако на декларацијата стои тој податок,
мора веднаш да се забрани таа храна, но најчесто нема такви податоци, а
инспекторите не знаат дали содржи бидејќи нема лабораторија во која ќе
се испита - велат од надлежните институции.
Ниту професорот на
Земјоделски факултет Цане Стојковски, не ја исклучува можноста за
присутност на ваква храна на нашиот пазар. Тој вели дека мора побрзо да
се донесе закон и да се опреми лабораторија што ќе врши вакви
испитувања.
- Ние само можеме да претпоставуваме дали таква
храна влегла во земјава. Генерално досега не е докажано дека
ГМО-храната е штетна за луѓето, а во секој случај економски е многу
исплатлива за тие што ја произведуваат бидејќи дава големи приноси -
вели тој.
Од Министерството за земјоделство велат дека е можно
генетски модифицирана храна да влегува во земјава по шверцерски канали.
А на голем дел од производите нема декларација за содржината на
производот. Од таму соопштуваат дека законот што се работи во
Министерството за животна средина најверојатно ќе се донесе в година.
-
Се работи за регулатива што мора да се усвои. Ние не знаеме дали тој
ориз се продава на нашиот пазар, бидејќи никој не го проверува - велат
од Министерството за земјоделство.
Според нив, постојат неколку типови генетски модифицирани организми
- едни како состојка во храната, други како производ во фармацевтската
индустрија и трети се репроматеријали од земјоделско потекло.
-
Светското искуство досега покажа дека нема цврсти докази за штетноста
на оваа храна, но има индикации дека може да има нарушувања на
животната средина. Во светот се произведува генетски модифицирана
сточна храна, пченка, житарки, репка, соја, ориз. Научниците реагираат
дека таа храна е штетна за луѓето, но досега не ја докажале штетноста,
а производителите тврдат дека е економски исплатлива и не е штетна.
Индустријата за производство на семенски материјал е многу моќна и може
да влијае да продолжи консумацијата на ваквата храна. Како ќе се одрази
тоа на здравјето на идните генерации не се знае - велат познавачите.
Инаку,
Гринпис не истакнува за кои количества кинески ориз станува збор.
Спорниот кинески ориз модифициран за да биде поотпорен на одреден вид
инсекти е пронајден во примероците на тестенини од ориз во Франција и
во Германија, и фиде од ориз во Британија - соопштуваат од Гринпис.
Модифициран компир уби глувциУнгарскиот научник Пустај, правејќи експеримент, на група глувци им
давал генетски модифициран компир, а на друга обичен. Првата група
глувци по краток период умреле, а стомаците им биле уништени. По
објавувањето на резултатите од експериментот, врз научникот биле вршени
големи притисоци и останал без работа. Сепак производството на генетски
модифициран компир во меѓувреме замре.
Генетски модифицирани
организми се организми на кои им е изменет дел од генетскиот материјал,
односно ДНК, преносителот на наследните особини. Прво се
експериментирало со пониските организми, бактерии и вируси, а на крај
со животните и човекот. Со пресадување на гените што влијаат на
висината, можат да се добијат многу покрупни билки и многу послатки
плодови. Најчести производи подложни на генетска модификација се соја,
пченка, компир, репка и ориз. Генетско модифициран компир засилен со
протеини ги оштетува црниот дроб и создава низа здравствени проблеми.
ГМ-ориз е опасен и за луѓето и за животната средина. Жолтиот ориз
настанал со вкрстување два гена на нарцис и еден од бактерија.
Во МАНУ има лабораторија за ГМОВо Македонија постои лабораторија со најсовремена опрема за
испитување на ГМО во храната. Станува збор за лабораторијата за
генетско инженерство во МАНУ, со која раководи академик Ѓорѓи Ефремов.
-
Лабораторијата е целосно подготвена и кадровски и технички за вакви
испитувања. Ние досега неколкупати сме се обратиле до министерствата за
земјоделство, екологија и економија, во кои им укажавме дека за три
дена можеме да направиме вакви истражувања, но досега не ни одговориле
- вели академик Ефремов, кој е директор на Истражувачкиот центар за
генетско инженерство и биотехнологија во МАНУ и член на меѓународното
здруженија за генетско инженерство.